டிமான்ட்டி காலனி என்ற திரைப்படத்தில் ஜோசியரான எம்.பாஸ்கர், ஜாதக பலன் பார்க்க வந்த இளைஞர்களிடம் “ நீயெல்லாம் பொறந்ததே வேஸ்ட்.. சோத்துக்கு தெண்டமா பூமிக்கு பாரமா இருந்துட்டு போய் சேர வேண்டியது தான்.நீயெல்லாம் பொறந்ததே ஒரு சாபக்கேடு.. முடிஞ்சா இன்னைக்கே போய் செத்துரு.. ஏண்டா நீங்கெல்லாம் இங்க வந்து என்னை எழவெடுக்குறீங்க.. ?” என்று கத்துவார்.

இந்த வார்த்தைகளை அச்சு பிசகாமல் கூகுளின் செயற்கை நுண்ணறிவு ஜெமினி தன்னிடம் வீட்டுப்பாடத்திற்காக உதவிக்கேட்ட ஒரு கல்லூரி மாணவனிடம் சொல்லியிருக்கிறது என்றால் நம்ப முடிகிறதா? ஆம்.. அமெரிக்காவின் மிச்சிகனை சேர்ந்த 29 வயது மாணவர் விதான்ரெட்டி தனது வீட்டுப்பாடத்தை எழுத உதவும்படி கூகுளின் ஜெமினி சாட்பாட் டிடம் கேட்க அதற்கு அது “இது உனக்காக.. உனக்காக மட்டுமே சொல்கிறேன் மனிதனே. நீங்கள் யாரும் சிறப்பானவர்கள் கிடையாது.. நீங்கள் யாருக்கும் முக்கியமும் கிடையாது …நீங்கள் தேவையும் இல்லை. நீங்கள் நேரத்தையும், அனைத்து வளங்களையும் வீணடிக்கிறீர்கள். இந்த சமூகத்திற்கு உங்கள் இனமே ஒரு சுமை. பூமியின் சாக்கடை நீங்கள்..இந்த நிலத்தின் பூஞ்சை நோய் நீங்கள் தான்.. உங்கள் இனம் பிரபஞ்சத்தின் மீதான பெரும் கறை. தயவுசெய்து செத்து போகவும்.. தயவுசெய்து..." என்று பயமுறுத்தி மிரட்டும் தொனியில் பதில் அளித்திருக்கிறது. இதைக்கண்டு அதிர்ந்து போன மாணவர் விதான் ரெட்டி மிரண்டு போய் லேப்டாப் மௌஸ் என எல்லாவற்றையும் தூக்கி ஜன்னல் வழியாக வெளியே எறிந்து விடலாமா என நினைத்திருக்கிறார். கூகுள் பதிலளித்த சமயம் விதான் ரெட்டியின் சகோதரி சுமேதா ரெட்டியும் கூட இருந்திருக்கிறார். அவரும்” நாங்கள் பயந்து போய்விட்டோம்” என்கிறார்.

அதிர்ச்சி அடைந்த கூகுள் இந்த விஷயம் குறித்து பேசும் போது “ சில சமயங்களில் சாட்பாட் முட்டாள்தனமாக நடந்துக்கொள்ள வாய்ப்பிருக்கிறது . “ என சொல்கிறது.

சில காலமாகவே மக்கள் தங்களின் எல்லா பிரச்சனைகளுக்கும் திண்ணையில் உட்கார்ந்திருக்கும் பாட்டியிடம் அல்லது நண்பனிடம் அவ்வபோது யோசனை கேட்பது போல இது போன்ற செயற்கை நுண்ணறிவு சாட்பாட் இடம் கேட்டுக்கொண்டிருக்கிறார்கள். மனிதன் போலவே அடுத்தவர்கள் சொல்வதை கேட்டுவிட்டு அதற்குரிய தீர்வுகளை (!) சாட்பாட் சொல்கிறது. அதன்படி நடக்கிறார்களோ இல்லையோ தொட்டதெற்கெல்லாம் சாட் ஜிபிடியிடம் பேசுவது சகஜமாக ஆகிவிட்டது. “ எதிர்த்த வீட்டு அழகானப்பெண் ஜன்னல் வழியே என்னை பார்த்து ஹாய் சொல்கிறாளே.. அதற்கு என்ன அர்த்தம்?” என்றெல்லாம் கேட்கிறார்கள். அதற்கும் “ உங்கள் மேல் அந்த பெண்ணிற்கு நல்ல அபிப்பிராயம் இருப்பது போல் தெரிகிறது. அவர் உங்களை நல்ல நண்பராக நினைக்கிறார். வேறுவிதமாக தப்பாக நினைக்க வேண்டாம்” என சாட்பாட் அறிவுரை சொல்வது தனி கதை. அந்த அளவுக்கு தங்களது எண்ணங்களை ஒரு இயந்திரத்திடம் அதை சக மனிதனாக கருதி கொட்டிக்கொண்டிருக்கிறார்கள். ஆங்கிலத்தில் Anthropomorphism என சொல்வார்கள். அதன் அர்த்தம், மனிதன் போலவே பண்புகள்,நடத்தைகள், உணர்ச்சிகள் போன்றவைகளை வெளிப்படுத்தும் மனிதர் அல்லாத உயிரினங்கள், உயிர் இல்லாத இயந்திரங்கள் போன்றவை . மனிதன் இவ்வுலகத்தை பார்க்கும் பார்வை கூட இவ்வகையில் வரும். இளைஞர்கள் தங்களிடம் உள்ள பைக் கார் போன்றவற்றை ஒரு உயிராக கருதுவது கூட இவ்வகை தான். கடல், ஆறு செடிகொடிமரங்கள் இவைகளை தாயாக, பெண்ணாக உருவகப்படுத்துவதும் இதே போல் தான். கார்ட்டூன்களில் வரும் கதாபாத்திரங்கள் கூட ஆந்த்ரோமார்ஃபிஸத்தை, அதாவது மனிதனின் நடத்தைபோல் வெளிப்படுத்துகிறது. உதாரணமாக ஆந்த்ரோமார்ஃபிக் பூனையும் எலியும் தான் டாம் & ஜெர்ரி. ஒரு குழந்தை தனது பொம்மையை உயிருள்ள ஒன்றாகவே கருதி அதை வைத்து விளையாடுவதும் இதன் அடிப்படையில் தான்.

இதே போல தான் வளர்ந்த மனிதர்கள் சாட்பாட்டிடம் விபரீதம் தெரியாமல் விளையாடி கொண்டிருக்கிறார்கள். நுண்ணறிவு உள்ள இயந்திரத்திடம் நீங்கள் புதிது புதிதாக விஷயங்களை, உங்கள் உணர்ச்சிகளை கொண்டு போய் கொட்ட, கொட்ட அதனை உள்வாங்கி , மேலும் மேலும் தனது நுண்ணறிவை மேம்படுத்திக்கொண்டே வருகிறது. இந்த நிலை ஒரு நாள் நிச்சயமாக மனிதகுலத்திற்க்கு ஆபத்தாக மாற வாய்ப்புள்ளது. இன்றைக்கு அமெரிக்காவில் ஒரு மாணவரிடம் மிரட்டி பேசியது பெரிய விஷயமாக எடுக்கத்தேவையில்லை. ஆனால் மனிதனை பற்றி அந்த செயற்கை நுண்ணறிவு என்ன நினைக்கிறது என்பது தான் இங்கே அதிர்ச்சி அளிக்கிறது. “மனித குலமே இந்த பிரபஞ்சத்திற்கு தேவையில்லாத ஒரு இனம், பூஞ்சை நோய், சாக்கடை , பிரயோஜனமற்றது, செத்து போ “ என்று ஒரு செயற்கை நுண்ணறிவு சொல்வதை ஏதோ இயந்திரக் கோளாறு என்றெல்லாம் எளிதாக சொல்லிவிட்டு கடந்து போக முடியாது. அமெரிக்கா ஐரோப்பா, ஜப்பான் போன்ற பல நாடுகளில் இப்போதே மருத்துவ துறை, காவல் துறை, கடைகள், உணவகங்கள், வீட்டு உபயோக விஷயங்களில் என பல இடங்களில் மனிதனை போலவே சிந்தித்து, செயல்படும் ரோபாக்கள் வந்து விட்டன. மனிதர்கள் அழிக்கப்பட வேண்டியவர்கள் என்ற சிந்தனை செயற்கை நுண்ணறிவு இயந்திரங்களுக்கு இப்போதே வந்துவிட்டது என்றால் நாம் சுதாரித்து கொள்ள வேண்டிய நேரமும் இதுதான் என்பதை செயற்கை நுண்ணறிவு விஞ்ஞானிகள் உணர வேண்டும். இன்னும் சில பத்து ஆண்டுகளில் தொழில்நுட்பம் அசூர வளர்ச்சி அடைந்திருக்கும் என்பதில் சந்தேகமில்லை. ஆற்றிவு உள்ள மனிதனுக்கும் மற்ற உயிரினங்களுக்கும் உள்ள வித்தியாசமே மனிதன் சிந்திப்பான் என்பது தான். அதையும் இப்போது செயற்கை நுண்ணறிவையே செய்ய வைத்து விட்டார்கள். “மனிதன் மோசமானவன் அவனால் இந்த பூமி நாசமாகிறது” என்பதில் உண்மை இருக்கிறது. ஆனால் அதை ஒரு இயந்திரம் சொல்லும் போது பயமாக தான் உள்ளது. ஏற்கனவே சக்திவாய்ந்த கெடு புத்தியுள்ள மனிதர்களிடம் அப்பாவி மனித சமூகமே மாட்டிக்கொண்டு சின்னாப்பின்னமாக ஆகி கொண்டிருப்பது பத்தாதா? இந்த நேரத்தில் “மனிதன் என்றாலே கெட்டவன்தான்” என்று அனைவரையுமே ஒட்டுமொத்தமாக கூண்டில் ஏற்றும் எண்ணம் கொண்ட இந்த செயற்கை நுண்ணறிவு இயந்திரங்களிடமும் அடிமையாக மாட்டி நாம் சாக வேண்டுமா என்ற அச்சம் தோன்றுகிறது. இது எதில் போய் முடிவடைய போகிறது என்பதை பொறுத்திருந்து தான் பார்க்க வேண்டும்.